(Казан, 25 декабрь, «Татар-информ»). Уругвай хакимияте 2021 елның икенче яртысында чит ил сәяхәтчеләрен кабул итә башларга уйлый. Бу хакта илнең туризм министры Герман Кардосога сылтама белән РИА Новости яза. «Бу планнарга кергән, моны иртәрәк тә эшли алырбыз дип өметләнәм. Барысы да пандемиянең ничек узуына бәйле», — диде ул. Аның сүзләренчә, Уругвай эпидемия белән көрәштә үрнәк ил булып тора һәм туризм буенча кызыклы юнәлеш булып санала. Сәламәтлек саклау министрлыгы мәгълүматлары буенча, илдә коронавирус йоктыруның 14 710 очрагы ачыкланган булган, ковид белән авырган 128 пациент вафат.
