Бөгелмә районында «Аударыш» татар ярышы булды
Бөгелмә районында татар халкының борынгы традицияләрен яңарталар. Шулай итеп, Карабаш авылында бик үк танылмаган, әмма экстрим өлеше белән мавыктыргыч булган «Аударыш» татар турниры узды. Бу хакта «Татарстан – Яңа гасыр» хәбәр итә.
Турнирда катнашучылар атларга утырып көрәште. Кул белән генә көрәшергә, билдән тартырга һәм көндәшнең атына кагылырга ярамый. Мондый шартларда уңыш җайдакка гына түгел, атка да бәйле.
«Һәр ат белән уртак тел табарга тиешсең. Башкача булмый», - дип сөйләде «Аударыш» турнирында катнашучы Илдан Хәйруллин.
Турнирны ат асраучы, татар токымын үрчетүче Фәрит Нәбиуллин оештырды. Аның сүзләренчә, элек ат чабышлары елына берничә тапкыр узган, атларда көрәш тә популяр булган. Шулай итеп, татар халкы үзенең яклаучыларын, кавалеристларын әзерләгән.
«Безнең якларда шундый егетләр булган, алар атта йөгереп барган килеш җирдән биш тиенне ала алган. Язмалар да, фото да бар. Бездә бу бар, һәм без хәзер моны яңадан күтәрәбез», - дип уртаклашты ул.
«Аударыш» бу якларда бишенче тапкыр уздырыла.