Рөстәм Миңнеханов Татарстан агросәнәгать комплексын үстерү стратегиясен төзүне хуплады
Татарстан Рәисе Рөстәм Миңнеханов Татарстанның агросәнәгать комплексын (АПК) үстерү стратегиясен 2030 елга кадәр төзүне хуплады. Бу хакта республика җитәкчесе Татарстан Авыл хуҗалыгы һәм азык-төлек министрлыгы коллегиясе утырышында хәбәр итте. Бу турыда «Татар-информ» хәбәрчесе Надежда Гордеева яза.
«Бу бик мөһим документ. Алга таба кая хәрәкәт итәргә икәнен белү өчен яхшы аналитика кирәк. Стратегияне эшләргә һәм кабул итәргә кирәк, дип уйлыйм», - диде Татарстан Рәисе.
Рөстәм Миңнеханов искәрткәнчә, эсселек һәм корылык аркасында узган ел авыл хезмәтчәннәре өчен бик катлаулы булды. Татарстан бары тик 3,6 млн тонна ашлык җыя алды, күпчелек очракта агротехнологияләр куллану хисабына.
«2010 елда 700 мең тонна ашлык җыйганны хәтерлибез. Корылык шундый ук иде. Мелиорация, орлыкларның корылыкка чыдам сортларын, технологияләр куллану үзебезне ашлык белән тәэмин итәргә мөмкинлек бирде. Күп чыгым чыгардык, шактый алып бетермәдек. Ләкин тагын да начаррак булуы мөмкин иде», - диде ул.
Язгы кыр эшләрен уңышлы оештыру бүген төп бурыч булып тора. Һәм бу күбесенчә авыл хуҗалыгы техникасын сыйфатлы әзерләүгә бәйле, дип билгеләп үтте республика җитәкчесе. Аның сүзләренчә, запас частьләр мәсьәләсе актуаль булып кала. «Бүген республикада 15 оешма запас частьләр әзерли, шул исәптән чит ил техникасына да. Параллель импорт белән эшләү мөмкинлеге табучылар да бар», - дип белдерде Татарстан Рәисе.
Ул Татарстан Сәнәгать һәм сәүдә министрлыгы белән Авыл хуҗалыгы һәм азык-төлек министрлыгына республика территориясендә үзебезнең техниканы һәм запас частьләр җитештерү эшен оештыру мөмкинлеге турында уйларга кушты. «Корылык булу һәм дым җитмәү сәбәпле, безгә җайлашырга кирәк. Экспертлар комплекслы сыек ашламаларның югары нәтиҗәлелеген билгеләп үтә. Аларны куллану буенча эшне көчәйтергә кирәк», - дип өстәде Миңнеханов.
Шуңа бәйле рәвештә производство өчен техника һәм җиһазлар, сыек ашламалар саклау һәм кертү бәясенең 50 процентын субсидияләү турында карар кабул ителде. Моннан тыш, быел ашламалар сатып алуга субсидияләр саклана, кимендә 50 килограмм ашлама тупларга кирәк.
«Куркыныч зур. Безгә чәчүлекләрне иминиятләштерергә кирәк. Авыл хуҗалыгы һәм азык-төлек министрлыгына иминият компанияләре белән иминиятләштерү мәсьәләсе буенча хуҗалыклар белән даими элемтәдә торуны тәэмин итәргә кирәк. Корылык шартларында мелиорациягә зур игътибар бирү мөһим. Әмма шул ук вакытта бездә файдаланылмаган гидротехник корылмалар да бар. Монда программаны формалаштырырга кирәк», - дип мөрәҗәгать итте республика җитәкчесе.
Татарстан Рәисе ышандыруынча, барлык кыенлыкларга да карамастан, агросәнәгать комплексына ярдәм дәвам итәчәк. Ул шулай ук авыл халкына махсус хәрби операциядә катнашучыларга ярдәм өчен рәхмәт белдерде. «Республика аграрийлары безнең хәрбиләргә һәм яңа төбәкләргә йөзләрчә тонна авыл хуҗалыгы продукциясе җибәрә. Моннан тыш, Кулланучылар оешмасы берлеге идарәсе («Татпотребсоюз») яңа төбәкләрдә үз кибетләрен ачты», - дип йомгаклады ул.