Казанның 155нче гимназиясендә Нурихан Фәттах музее ачылды
Казанның 155нче гимназиясендә Татарстанның халык язучысы Нурихан Фәттах музее ачылды. Әлеге тантаналы вакыйганың шаһиты булырга һәм чыгыш ясарга теләгән кешеләр шулкадәр күп иде – тантана берничә сәгатькә сузылган мәдәни чарага әверелде.
«Бүген безнең гимназиядә зур вакыйга. Күренекле шәхесебез Нурихан ага истәлегенә багышланган музей ачылу безнең өчен зур дәрәҗә. Киләчәктә ул безгә җаваплылык та өсти», – диде кунакларны сәламләп гимназия директоры Наил Фазылов.
Ул музей бүлмәсе ачуның финанс ягын хәл иткән Казан шәһәре Мәгариф идарәсенә рәхмәтләрен җиткерде. «Финанс ягы хәл ителмәгән булса бүгенге музеебызның җитешсез яклары да булыр иде», – диде ул.
«Без бу көнне көттек. Тукай музеенда Нурихан аганы искә алганда Руфина апа нәкъ менә шушы идея белән чыккан иде, зыялыларыбыз хәтта имзалар да җыйды. 1 елга якын вакыт эчендә без бу идеяне тормышка ашырдык – мәктәп җитәкчелегенә бик зур рәхмәт!» - диде әлеге тантанага килгән Казан шәһәре башкарма комитеты җитәкчесе урынбасары Гүзәл Сәгыйтова.
«Казанның 165нче «Адымнар» мәктәбендә Аяз Гыйләҗев музее бар. 12 нче гимназиядә Туфан Миңнуллин музее бар. Әкренләп язучыларыбыз мәктәпләргә керә. Олпат шәхесләребез өчен мәктәп бәлки кечерәктер, киләчәктә зур-зур музейларыбыз булсын! Шушы кечкенә генә музей зур мирасханәләргә илтсен!» – диде ул.
«Без шактый катлаулы дөньяда яшибез, табигый бәла-казалар да булып тора, илләр белән илләр арасында низаглар да килеп чыга. Ә без сезнең белән игелекле гамәл белән шөгыльләнәбез – кешелек дөньясын китаплы якты якка тартып барабыз», – дип шагыйрәнә чыгыш ясады Татарстанның халык шагыйре Зиннур Мансуров Татарстан Язучылар берлеге исеменнән.
«Без зур тарихлы халык, гасырлар кичә-кичә тарихи ядкәрьләребезнең бер өлеше югалган, бер өлеше яндырылган да, бер өлеше урланган да. Тарихыбызны бозып язу очраклары да күп булды. Бу җәһәттән узган гасырның алтмышынчы елларында Нурихан Фәттах кебек олпат әдибебез калкып чыкты. Ул үз гомерен профессиональ дәрәҗәдә тарихи әсәрләр язуга багышлады», – дип дәвам итте ул.
Зиннур Мансуров «туган телебез авырлыклар кичергән чорда» Нурихан Фәттах эшен дәвам итүчеләр, тарихи әсәрләр язучылар булырмы дип борчылуын белдерде. «Нурихан Фәттахның дәвамчысы булган Вахит Имамов биредә утыра. Ә аның дәвамчылары кемнәр булыр? Бөтен ышаныч сездә. Бүген ачылачак музей шушы варисларны тәрбияли торган үзәк булсын», – диде халык шагыйре.
Зиннур Мансуров Ркаил Зәйдулланың сәламнәрен җиткереп, аның исеменнән Татарстан Язучылар берлегенең бу музейга ярдәм итеп торачагын вәгъдә итте.
Казан шәһәре Мәгариф идарәсе башлыгы урынбасары Альберт Әхмәтов үз чыгышында 155нче гимназиянең иң алдынгы гимназияләрнең берсе булуын ассызыклады. Алга таба мәктәп администрациясе алдына Нурихан Фәттах исемендәге фәнни-гамәли конференция оештыру максатын куйды.
«Нурихан Фәттах нәрсә уйлады – шуны язды, нәрсә уйлады – шуны әйтте. Ул кешеләр белән аралашмаган, хакимияткә каршы булган дигән сүзләр дөрес түгел, ул каршы булмады, ул эшләде дә эшләде. Кем өчен эшләгәнен белеп эшләде – халыкка хезмәт итте», – диде Нурихан Фәттахның тормыш иптәше Руфина Фәттахова һәм экспозиция өчен яңа экспонатлар тапшырды.
Музей ачылу тантанасында Камал театры артистлары Равил Шәрәфиев, Дания Нуруллина, Зөлфирә Зарипова, Тинчурин театры артисты Зөфәр Харисов, язучылар Вахит Имамов, Зиннур Хөснияр, Эльмира Шәрифуллина һәм башкалар катнашты. Күренекле шәхесләр Нурихан Фәттахка бәйле истәлекләр белән уртаклашты. Кайчандыр Нурихан Фәттах әсәрләре буенча куелган спектакльләрдә уйнаган Дания Нуруллина, Зөфәр Харисов шул әсәрләрдән монологлар сөйләде.
Мәктәп укучылары Нурихан Фәттахның «Итил суы ака торур» әсәреннән театраль өзек әзерләгән иде. Кичә барышында Нурихан Фәттахның «Кырык дүртнең май аенда» повесте буенча төшерелгән фильмнан өзек күрсәтелде. Кичәдән соң кунаклар гимназиянең өченче катында урнашкан музейны карады.