Миңнеханов Татарстанда үтәчәк халык бәйрәмнәре турында: Лаеклы дәрәҗәдә уздырырга кирәк
Татарстан Рәисе Рөстәм Миңнеханов республикада халык бәйрәмнәре башлануын искәртте. Алар иртәгә, 26 майда, Лаеш районында рус халык бәйрәме Каравон белән башланып китәчәк. Бу хакта ТР җитәкчесенең матбугат хезмәте хәбәр итә.
ТР Хөкүмәте йортында узган киңәшмәдә Миңнеханов барлык чараларны иң югары дәрәҗәдә оештырырга чакырды. Йөкләмә бәйрәм чаралары узачак район башлыкларына бирелде.
«Хөрмәтле башлыклар, бу бәйрәмнәрнең барысын да лаеклы уздырып җибәрергә кирәк. Иминлекне тәэмин итүгә аерым игътибар бирү зарур», — диде Татарстан җитәкчесе.
Милли мәдәният бәйрәмнәре авыллар һәм район үзәкләрендә (8-9 июнь), Чаллы һәм Түбән Камада (15 июнь), Казанда (23 июнь) Сабантуйлар белән дәвам итәчәк. 15 июньдә Мамадыш районында Семык мари мәдәнияте бәйрәме, 29 июньдә Менделеевск районында Гырон Быдтон удмурт мәдәнияте бәйрәме оештырыла. 30 июньдә Тәтеш районында Валда Шинясь мордва мәдәнияте бәйрәме, ә 6 июльдә Әлки районында Уяв чуваш мәдәнияте бәйрәме узачак. Моннан бер көн алдан Яшел Үзән Иван Купаланы бәйрәм итү мәйданчыгы булачак, ә Мамадыш районында 13 июльдә керәшен Питрау бәйрәме узачак.