Алматы-Ташкент тасжолының көлік кептелісі тұрғындардың наразылығын туғызды
Алматы-Ташкент тасжолының 19-шы шақырымындағы көлік кептелісі сейілер емес. Жүргізушілер кептелісте сағаттап тұруға мәжбүр. Тұрғындар жолды кеңейтіп, кері бұрылатын қосымша көпір салмайынша бұл мәселе ешқашан шешілмейтінін айтады. Massaget.kz тілшісі тұрғындармен сұхбаттасып көрген еді.
Материалдың толық нұсқасын МЫНА СІЛТЕМЕ арқылы Massaget.kz сайтынан оқи аласыздар.
"19-шы шақырым" дегенде көлік жүргізушілерінің жүйкесі сыр бере бастайды. Өйткені дәл осы тұста кептеліс күндіз де, түнде де болады. Қалаға кіріп-шығу оңай емес. Таңғы уақытта Алматы облысынан қалаға көлік ағылады. Сағат 6-дан кейін жүйткіген темір тұлпарлардың жүрісі кібіртіктеп қалады. Сондықтан жүргізушілер бұл маңнан ертерек өтіп кетуге тырысады. Ал үлгермегендер кептелісте тұруға мәжбүр.
"Мен күн сайын Ұзынағаштан Алматыға барамын. Қаскелең мен осы аралық небәрі 3 шақырым. Соның өзін әрең дегенде титықтап жүреміз. Кептелісте 2 сағат тұрамыз. Екі жыл болды ғой осылай жүргенімізге. Бұл проблема қашан бітеді?" - дейді көлік жүргізушісі Сейітқұл Өзбеков.
Кептеліс кесірінен жолаушылар діттеген жеріне кешігіп жетеді. Қалаға қатынап жұмыс істейтін облыс тұрғындары жол азабын күнде көреді. Ал, кешке үйлеріне қайтулары бұдан да қиын.
"Бұл жерге "Асыл арман" тұрғын үй кешеніндегідей автокөлік жүретін айналма көпір салу керек. Сонда жақын маңдағы ауыл тұрғындары сол көпірге шығып, өзінің жолына түсіп Алматығы кетеді. Қаскелең жақтан келетін елге ешқандай кедергі келтірмейді", - дейді жүргізушіс Айдос Смағұл.
Кептелістің туындауына бір ғана себеп бар. Қарасай ауданы, Ұмтыл ауылдық аймағынан шығып, Алматыға баратын көліктер Үлкен Алматы айналмалы жолына түсе алмайды. Сондықтан "Алматы-Ташкент" күре жолына шығып, кері айналулары керек. Жол тар болғандықтан бұрылыс қарсы бағыттағы қозғалысқа кедергі келтіреді.
Мәселені реттеу үшін жолды кеңейту керек. "Қазавтожол" ҰК АҚ Алматы облыстық филиалы директорының орынбасары Шыңғысхан Мұратбекұлының айтуынша, жобаның тек сызбасы ғана жасалған екен.
"Кеңейтілетін жол жобасының нобайы бар. Алты жолақты жол бойында жолайрық пен жаяуларға арналған екі көпір салу көзделген. Қарсы бағытқа өтетін тұсы Долан ауылының маңында орналасады. Қазір жол құрысына қажетті жер телімдерінің кімге тиесілі екенін анықтау жұмысы басталды. Алдымен соны аяқтап алуымыз керек", - дейді ол.
Материалдың толық нұсқасын МЫНА СІЛТЕМЕ арқылы Massaget.kz сайтынан оқи аласыздар.