Уфа кешесе хатынына бензин сибеп ут төрткән, нәни кыз әнисен коткарып калган
Уфаның Киров районы буенча тикшерү бүлеге 44 яшьлек ир-атка карата «үтерергә маташу» маддәсе буенча гаепләү белдерде. Бу турыда Россия Тикшерү комитетының Башкортстан буенча Тикшерү идарәсенә сылтама белән «Башинформ» хәбәр итте.
Тикшерү версиясе буенча, 17 сентябрьдә кич белән «Дубрава» бакчачылык ширкәтендәге бер өйдә ир белән хатын талаша. Аннары ир-ат бензин салынган канистра ала һәм хатынына сибә. Ир-ат хатынына ут төртә. Өй янында булган кызлары талашкан тавышларны ишетә. Ул әтисе белән әнисе янына керә. Кыз бала ут капкан анасын сүндерә башлый. Аннары кыз ашыгыч ярдәм чакыра.
Вакытында ярдәм күрсәтү нәтиҗәсендә, хатынны коткарып калалар. Аның тәненең 70 проценты 2 һәм 3 нче дәрәҗәдә пешә. Хәзер ул реанимациядә ята.
«Гаепләнүче белән тикшерү гамәлләре үткәрелде. Аны сак астына алу турында карар кабул ителде», дигәннәр ведомствода.
Яраланган хатын суд приставы булып эшләгән дигән белешмә бар. Аңа 11 яшьлек кызы ярдәм иткән, диелә хәбәрдә.