Башкортстанда тагын бер мәчет янган
15 апрельдә Башкортстанның Аскын районы Солтанбәк авылында агач мәчет янган. Башкортстан буенча Гадәттән тыш хәлләр министрлыгында хәбәр итүләренчә, янгында зыян күрүчеләр булмаган. Бу хакта «ДТП02 Уфа Башкирия» «ВКонтакте» төркемендә хәбәр итәләр.
«Беренче булып Солтанбәк һәм Урмияз авыллары янгын сүндерүчеләре килде, алар башланган янгынны локальләштергән һәм ачык утны сүндерә алган», – дип диелә министрлык хәбәрендә.
Янгынны Гадәттән тыш хәлләр министрлыгы хезмәткәре тикшерә.
Башкортстанның Бүздәк районында Иске Богады авылында 10 апрель көнне – Ураза гаете төнендә дә мәчет януын хәбәр иткән идек.