Польша менен Беларус орус мунайын өткөрүүдөн баш тартты
Польша менен Беларус "Дружба" өткөргүчү аркылуу орус мунайын кабыл алууну токтотушту. Буга батыштык сатып алуучулар "булганган жана сапаты начар" деген негизде орусиялык мунайды алуудан баш тартканы жүйө келтирилди.
Беларус 19-апрелде советтик доордо курулган "Дружба" өткөргүчү аркылуу келген мунайдын сапаты кескин начарлап кеткенин билдирген. Булганычтын булагы Орусиянын Самара-Унеча мунай өткөргүчүнө жакын жерден табылганын айткан.
Мунай өткөрүүгө жооп берген "Гомельтранснефть - Дружба" компаниясы нефти ташуунун токтотулушунун чоо-жайы белгисиз деп кабарлады. Шаршембиде аталган компания орус мунайын Чехия, Словакия жана Венгрияга Украина аркылуу өткөн түтүк аркылуу жеткирүүнү улантып жатканын жарыялады.
Польша аркылуу мунай ташуунун токтотулушу - кардарлардын бул өлкөдөгү жана Германиядагы кайра иштетүүчү заводдоруна "Дружба" аркылуу нефти келбей калды дегенди түшүндүрөт.
Батыштык сатып алуучулар 25-апрелде "Reuters" агенттигине орусиялык мунай жеткирүүчүлөргө каршы сотко кайрылып, компенсация талап кылышы мүмкүн экенин билдиришкен.
"Дружба" - дүйнөдөгү эң узун мунай өткөргүч болуп саналат.