Санкцисем ура хураççĕ-и?
Çиччĕ виç те пĕрре кас! Валентина Яичникова мăшăрĕпе пĕрле вăрах вăхăт хăйĕн ĕçне уçасси çинчен шухăшланă. Социаллă контрактпа усă курса 250 000 тенкĕ илсе тĕрлĕ апат-çимĕç хатĕрлесе кăларма пуçланă. Çамрăк усламçă санкци вăхăтĕнче мĕнле пурăнать-ха? Унпа пирĕн пултарулăх ушкăнĕ вырăна тухса паллашрĕ. ВАЛЕНТИНА ЯИЧНИКОВА: «Эпĕ нумай магазинта ĕçленĕ. Çынсем пĕрмай апат çиеççĕ. Çавна асăрхарăм. Хамăн ĕçе уçма шутларăм. Пĕрмаях кам çине те пулин ĕçлесен ĕç пымасть. Санкцисене хальлĕхе туйса ĕлкĕреймерĕмĕр-ха. Çавăнпа эпир пуç усмастпăр». Çăнăх, сахăр хакланнă пулин те Валентина Яичникова малалла талпăнать. Кунсерен 50-60 килограмм пельмень, люля-кебаб, вĕтетнĕ аша купăста çулçипе çавăрса тата ытти çимĕçе хатĕрлес ĕç кал-кал пырать. Людмила Степанова тата Раиса Краснова кунта нумаях мар пулин те тăрăшса вăй хураççĕ. Юратнă ĕçре вăхăт иртни сисĕнмест теççĕ. Кашни çимĕçе юратса, тăрăшса хатĕрлеççĕ. РЕГИНА КУБАЙКИНА: «Светофорики» пельменсене ача-пăчасем питĕ кăмăллаççĕ, мĕншĕн тесен вĕсем тĕрлĕ тĕслĕ. Саррине кишĕртен, хĕрлине хĕрлĕ кăшманран, симĕссине шпинатран тăваççĕ. Çĕнĕ йышши технологисемпе кунта анлă усă кураççĕ пулин те çав вăхăтрах пельменницăна тĕл пулма пулать. Ăна ятарласа пĕлтерӳсем тăрăх шыраса тупнă. Хăй вăхăтĕнче вăл 1 тенкĕ те 95 пус тăнă». Производство ĕçĕ Кӳкеçре. Пӳлĕме тара тытма кунта йӳнĕрехчĕ, çапах халĕ хакланма пуçларĕ. Мĕн пур çăмăллăхпа тивĕçтернĕ, мĕншĕн тесен кунта ĕлĕкрех кафе пулнă. Валентина малашне икерчĕ, глютенсăр тĕрлĕ апат-çимĕç кăларасшăн. Пурăна киле çакăнтах лавкка уçас шухăш пур тет. Санкцисене пула пусăрăнчăк кăмăлпа çӳреме пĕрре те вăхăт çук, ĕç вĕресе тăрать тет вăл. ЛЮДМИЛА СТЕПАНОВА: «Мана хамăн ĕç питĕ килĕшет. Юратса, тăрăшса ĕçлетпĕр Райăпа. Пĕтĕмпех хамăртан килет. Пĕр-пĕрне юратса, килĕштерсе пурăнсан çав санкци те пĕтме пултарать». – Çăнăхне, сахăрне саппаспа илсе хутăр-и? – Çук, илмен. 275 тенкĕпе ăсатаççĕ çак тĕрлĕ тĕслĕ пельмене Çĕнĕ хулари лавккана Яичниковсем. Унта ăна хитре хуплашкапа илемлетсе пайăррăн уйăрса тухаççĕ. Кунта çак çимĕçе 375 тенкĕпе туянма пулать. Лавккара ĕçлекенсен шалăвне, тĕрлĕ хăтлăхсемшĕн кăларнă пая шута илсен ку пысăк хак мар теççĕ лавкка хуçисем. Комсомльски юр-варне, Ишлей, Вăрнар кăлпассисем, Патăрьелĕн лаша какайĕсем, Муркаш ашĕ – йăлтах хамăр тăрăхра туса илекен тавар. Туянакан та хаваспах кунта çӳрет. Владимир Емельянов санкцисене пула хаксем ӳссе кайнишĕн ытлашши пăшăрханмасть. Çынсене те ăнланса пулать – тĕрлĕ вăрçă-харçăна, выçлăха пула чылайăшĕ тăрук хăраса ӳкнипе сентресене çаратма хăтланать. ВЛАДИМИР ЕМЕЛЬЯНОВ: «Ним те илсе хуман. 1 килограмм сахăр пур. Тепĕр кило хура тул пур. Тата мĕн кирлĕ пире? Çăкăр кашни кун сутаççĕ. Лайăх лару-тăру пултăр, вара пурăнатпăр». Тĕрлĕ таварпа тивĕçтерекенсем 30-40 процент хаксене ӳстерни, паллах, никама та савăнтармасть. Лавкка хуçисене те, унта çӳрекенсене те. Сахăр 80 тенкĕпе сутаççĕ. «Вăл пĕрре те пирĕн патран çухалман. Шупашкар, Чулхула, Вологда çăнăхĕсем те кунтах. Çапах та тăвар ытти чухнехинчен нумайрах туянма пуçлани сисчĕвлентерет теççĕ лавкка хуçисем. Хальлĕхе вăл 13 тата 29 тенкĕ. Регина Кубайкина, Георгий Кривошеин