Полина Победа: Ыам ыйа
ЫАМ ЫЙА ураты!
ЫАМ ЫЙА сааскыбыт!
ЫАМ ЫЙА Кыайыыбыт!
ЫАМ ЫЙА сайыммыт!
Биир ыйга түмсүбүт
Бэчээппит, сибээспит
Араадьыйа, пиэнньиэрбит
Төрөөбүт күннэрэ!
Сырдыкка анаммыт,
Үөрүүлүүн үөрдүспүт
Бу ыйга төрөөбүт
Киһи да ураты!
Олоххо тардыһыы,
Тапталы сыаналыы,
Кэрэни кэрэхсиир
Мин ыйым! Мин күнүм!
Айыыһыт анаабыт,
Аанньалым алҕаабыт:
«Таптаа эн сир оҕото
Күнү, ыйы, халлааны!».
Үөһэттэн этитэн,
Тапталга ананан
Күөх окко түспүппүн!
Бу сиргэ кэлбиппин!
Суруйуум-бичийиим
Олоххо анаммыт!
Таптыырым-иэйэрим
ЭЙИЭХЭ! КИНИЭХЭ!
Ким өйдүүр, ким сэргиир
Миигинниин бииргэҕит!
Ким саныыр, ким таптыыр
Сүрэхпэр сөҥнүгүт!
Сүһүөхпэр эрчимнээх,
Санаабар тэтимнээх,
Сүрэхпэр тапталлаах
Салҕанар олоҕум!
9 МААЙ
Мин ийэбэр 9 МААЙ
Бэлэхтээбит кыыс оҕо!
Аан дойдуга 9 МААЙ
Кылбаарбыта КЫАЙЫЫТА!
Мин олохпор 9 МААЙ
Аанньал күнэ буолбута!
КЫАЙЫЫ кыымнаах 9 МААЙ
Дойду дьоһун үөрүүтэ!
Эдэр кэмтэн 9 МААЙ
Тапталынан тыыннарда!
Сылын аайы 9 МААЙ
Санат миигин тапталбар!
Сааһырарбын утарсар
Тылбар, өйбөр 9 МААЙ!
«Олох кэрэ!» дэттэрэр
Өһөс, күүстээх 9 МААЙ!
Сааспар сылы эбээри
Тиийэн кэллэ 9 МААЙ!
Кыайыыларга сирдээри
Үүннэ бүгүн 9 МААЙ!
ПОЛИНА ПОБЕДА. 09.05.2026
Фото: Надежда Коротова, сетевое издание SAKHALIFE.RU
Убайбыт Мандар Уус туох диирий
Сообщение Полина Победа: Ыам ыйа появились сначала на SAKHALIFE.RU - Новости Якутии и мира.