საგარეო საქმეთა ყოფილი მინისტრი მიხეილ ჯანელიძე: რაც მმართველმა ძალამ გააკეთა, არის ძალადობა კონსტიტუციაზე, ქვეყნის წარსულზე, აწმყოსა და მომავალზე
საგარეო საქმეთა ყოფილი მინისტრი მიხეილ ჯანელიძე ე.წ. აგენტების კანონთან დაკავშირებულ პროცესებს გამოეხმაურა და თქვა, რომ მმართველმა ძალამ კონსტიტუციაზე, ქვეყნის წარსულზე, აწმყოსა და მომავალზე იძალადა.
„დღეს რაც მმართველმა ძალამ გააკეთა არის ძალადობა კონსტიტუციაზე, პოლიტიკაზე, საზოგადოებაზე, ქვეყნის წარსულზე, აწმყოსა და მომავალზე. ქართველი ხალხი და მისი ევროპული მომავალი გაიმარჯვებს! დემოკრატიული და მშვიდობიანი პროტესტის უფლება უნდა იყოს დაცული“, – აცხადებს ჯანელიძე.
ცნობისთვის, ე.წ. უცხო ქვეყნის გავლენის აგენტების შესახებ კანონპროექტს საქართველოს პარლამენტმა კენჭისყრაზე პირველი მოსმენით მიიღო, რასაც პარლამენტთან შეკრებილი საზოგადოების პროტესტი მოყვა.
საკანონმდებლო ორგანოსთან ერთმანეთს აქციის მონაწილეები და სამართალდამცველები დაუპირისპირდნენ.
ადგილზე მობილიზებულები არიან სამართალდამცველები და სპეცრაზმელები. აქციის მონაწილეების წინააღმდეგ ცრემლსადენი გაზი გამოიყენეს.