Брижит ешқашан болмаған: Макронның әйелі журналиске қарсы жаңа талап арыз түсірді
Эммануэль және Брижит Макрон америкалық белсенді Кэндис Оуэнске қарсы жаңа талап арыз түсірді. Президент жұбайының шағымында "орасан зор нұқсан келтірілгені" және "халықаралық деңгейде қорлау науқаны" жүргізілгені туралы айтылады, деп хабарлайды Tengri Life Euronew басылымына сілтеме жасап.
Ерлі-зайыпты Эммануэль және Брижит Макрон Теннесси штатының федералды сотына америкалық белсенді Кэндис Оуэнске қарсы жаңа талап арыз берді. Олар белсендіні Брижит Макрон "кезінде ер адам болған" деген жалған ақпарат таратты деп айыптады.
Бұған дейін америкалық судья 2025 жылдың жазында Делавэрде берілген алғашқы талап арызды ішінара қабылдамай тастаған болатын. Оған жұптың жеке өзіне қатысты юрисдикцияның жоқтығы себеп болған. Іс өндірісін тек Оуэнспен байланысты екі компанияға қарсы жалғастыруға рұқсат берілді.
Жаңа шағымда Макрондар отбасы алғашқы талап арыздан кейін де Оуэнстің "өз іс-әрекетін тоқтатпай", "жалған мәлімдемелерін үдете түскенін" алға тартады.
"Мәселе шындықты іздеуде емес, танымалдылыққа ұмтылуда болып отыр", - делінген құжатта.
Талап қоюшылардың айтуынша, оларға "орасан зор нұқсан" келтіріліп, "халықаралық деңгейдегі қорлау науқанының" нысанасына айналған.
Брижит Макрон туралы дезинформация Кэндис Оуэнстің Becoming Brigitte атты бейнероликтер сериясы шыққаннан кейін қайта өршіді. Жалған мәліметтер қастандық теориясын жақтаушылар арасында белсенді тарап жатыр. Олардың пайымдауынша, Брижит Макрон есімді әйел мүлдем болмаған, ал оның ағасы Жан-Мишель жынысын өзгертіп, оның есімін иемденген.
2026 жылдың басында Париж соты 10 адамды Франция президентінің жұбайы Брижит Макронды желіде қудалағаны үшін кінәлі деп таныды. Президент Эммануэль Макронның әйелі ер адам болып туған деген жалған пікірлер жазғаны үшін бір адам түрмеге қамалып, сегізі шартты түрде жазаға тартылды.