Өскемендегі даулы видеодан кейін отбасындағы жағдай комиссияда қаралады
Өскеменде ер адам 12 жастағы қызын ернінен сүйгені түсірілген видеоға қатысты тексеріс аяқталды. Бұл туралы Шығыс Қазақстан облысы Полиция департаменті баспасөз қызметінің өкілдері айтты, деп хабарлайды Tengrinews.kz тілшісі.
Ресми мәліметке сәйкес, жиналған материалдар кәмелетке толмағандардың істері жөніндегі қалалық комиссияның қарауына жолданды.
"Бұл дерек полицияда тіркелді. Тексеріс қорытындысы бойынша жиналған материалдар Өскемен қалалық кәмелетке толмағандардың істері және олардың құқықтарын қорғау жөніндегі комиссияқарауына жіберілді", - деп хабарлады мекеме.
Шығыс Қазақстан облысының әкімдігі де жағдайға қатысты пікір білдірді. Олар сала мамандары оқиғаның мән-жайын зерттеп, отбасына қажетті қолдау көрсеткенін атап өтті.
"Бала сабаққа қатысып жүр, оның мүдделері мен психологиялық амандығы басты назарда", - деп хабарлады облыс әкімдігінің баспасөз қызметі.
Мән-жайы
Еске сала кетейік, бұған дейін 12 жастағы қызды туған күнімен құттықтау сәті түсірілген видео әлеуметтік желілерде үлкен резонанс тудырды. Бейнежазбада ер адам қызын үйінде мерекелік тортпен қарсы алып, құттықтап, оны бірнеше секунд бойы ернінен сүйеді.
Бұл видео Threads желісінде наразылық пен жағымсыз пікірлер толқынын тудырды. Көптеген қолданушы әкенің мұндай әрекетін орынсыз деп санап, жағдайды тексеруді талап етті.
Полиция аталған дерек тіркеліп, тергеуге білім басқармасы мен жергілікті атқарушы орган қызметкерлері тартылғанын хабарлаған болатын.
Бұған дейін әлеуметтік желілерде тағы бір видео үлкен резонанс тудырды, бейнежазбада үлкен қыз көлікте отырып, баланы ернінен сүйеді.