Новости за 29.04.2020

1941-1945 шықәсқәа рзтәи Аџьынџьтәылатә еибашьра Ду аҟны Аиааира 75-шықәса ахыҵра Аԥсны иаԥылоит 46-ҩык аветеранцәа.

Аслан Бжьаниа инапынҵақәа хациркит мшаԥы 23 рзы. Азакәан инақәыршәаны, уаанӡатәи Аминистрцәа реилазаара атәыла ахада иҿаԥхьа ԥхьатәара ицеит.

Аиааира Ду 75 шықәса ахыҵра аҳаҭыр азы арадио Sputnik аусзуҩцәа аиҿцәажәарақәа анырҵоит. Мықә ақыҭа иалҵыз Аџьынџьтәылатә еибашьра Ду иалахәыз Ҭарашь Гәыдила-иԥа Цикәтаниа иҭоурых еиҭалҳәеит иԥҳа Мимоза.

Аԥыза-министр Александр Анқәаб лаҵара 15 рҟынӡа аԥкыратә уснагӡатәқәа ирыцҵазарц аӡбра идикылеит . Аԥкырақәа ирыҵанамкит ауаажәларратә транспорт аныҟәара.

Арадио Sputnik арубрика "Раионк аԥсҭазаараҟынтә" аҳәаақәа ирҭагӡаны Тҟәарчал араион Ҵарча ақыҭа ахада Анатоли Абӷаџьаа еиҭеиҳәеит рқыҭа иахьатәи абзазашьа атәы.

Жәиԥшь шықәса зхыҵуа Леван Инарцба хәажәкыра 6 рзы аҩны дахьдәылҵыз дыхнымҳәӡеит. Знык иҭаацәа аҭел дырзасит.

Аԥсны ахада Аслан Бжьаниа иусдҵа инақәыршәаны, Аԥсны 14 министрра ҟалоит 12 рҭыԥан, Аҳәынҭқарратә еилакқәа ааба, Аҳәынҭусбарҭақәагьы ааба.

Иахьатәи аамҭазы иҟоу Аҩныҵҟатәи аусқәа рминистрра адыррақәа рыла, 14-мштәи аҽыԥхьакра рхыргахьеит 500-ҩык рҟынӡа ауааԥсыра. Абри аамҭазы арежим аилагара хҭыск азгәаҭоуп.

Аԥыза-министр Александр Анқәаб мшаԥы 29 рзы идикылеит Аԥсны ауааԥсыра акоронавирустә инфекциа рацәыхьчаразы Аоперативтә штаб ахаҭарнакцәа.

Ақалақьбжьаратә транспорт аныҟәара шҳәаақәҵатәу ӡбахоит араионқәа рхадацәа алархәны.

Сынтәа аԥхын иаҳа ишоурахоит ҳәа аҵарауаа иҟарҵо азԥхьагәаҭарақәа заацәоуп ҳәа лгәаанагара лҳәеит арадио Sputnik Аԥсны аефир аҿы Аԥсны Аекологиатә институт ауcзуҩ, ААУ адоцент, афизика-математикатә ҭҵаарадыррақәа ркандидат Асида Ахсалԥҳа.

Адунеи зегьы акоронавирус апандемиа иамҽхакны ишамоугьы, урыстәылауаа аԥхынра аамҭа амшын аҿы ахгара мап рзацәкуам.

Facebook аԥсуа сегмент аҿы ицәырҵуа иалагеит ажәабжьқәа Аԥсны аҵакырахь иҭало реиҳараҩык асасааирҭа "Аиҭар" ахь аҽыԥхьакраз анеира иақәшаҳаҭым избанзар уа аҟазаара ахәԥса шәалатәуп ҳәа.

Аушьҭырҭатә ҭыԥ "Ԥсоу" иаԥну аџьармыкьаҿы мшаԥы 29 ауха амцакра ҟалеит ҳәа аанацҳауеит Аҭагылазаашьа ҷыдақәа рминистрра.

84 шықәса дшырҭагылаз зыԥсҭазаара иалҵыз Аԥсны афырхаҵа, Кавказ ашьхарыуа жәларқәа рконфедерациа ахадас иҟаз, ҳашьцәа нхыҵаа аибашьраан раара зыбзоуроу ируаӡәку Муса Шанибов дылгәалалыршәоит ибзианы дыздыруаз афилологиатә ҭҵаарадыррақәа рдоктор, апрофессор Лили Ҳагԥҳа.

Изакәузеи амшра, насгьы амшра-ҭыԥ шԥалыркаауа - абри атәы арадио Sputnik Аԥсны аефир ала ицо арубрика "Жәлар рдоуҳа" аҿы еиҭалҳәеит Аԥсуаҭҵааратә институт афольклортә лабораториа аусзуҩ Сусанна Ҭаниаԥҳа.

Анаркотикқәа идикылоит ҳәа агәҩара ззыҟаны мшаԥы 21 рзы иаанкылаз 1991 шықәсазы ииз Гәдоуҭа ақалақьуаҩ Алиас Ҭарба акамераҿы дыкнаҳаны дырбеит мшаԥы 27 рзы.