Венехь нохчийн кегийрхоша йоккха стаг кIелхьараяьккхина
Полисхоша дийцарехь, нах чохь бехачу доккхачу цIа чуьра шолгIачу гIат тIерачу петар чохь яьлла хиллера цIе. Луларчу хIусамашкахь бехачарна гина хиллера цIеяйархой схьа а кхачале чуьра хьалаоьху кIур. Орцахваьллачу кхаа жимчу стага неI йохош, чу а лилхина, араяьккхинера 87 шо долу меттахь йиссина йоккха стаг.
Орцанхой тIекхаьчначул тIаьхьа кегийчу наха гIо дина хиллера кхечу хIусамашкара нах арабохуш а. ЦIе дIаяйинчул тIаьхьа тапъаьлла къайлабевлла хиллера нохчий. Инцидентан декъашхоша социалан машанашкахула лоьхуш бара кегийрхой. Венера нохчийн, гIалгIайн кхеташонан къаной юкъагIоьртича схьакарийнера уьш.
Болчу хаамашца уьш бу СаидовгIеран вежарий Iадлан а, Бекхан а, церан нуц Шидаев Аслан а. Кхи цхьаъ а хиллера цаьрца, амма шен цIе яккха ца лаарна, иза къайлехь вуьссу.
Шаьш динарг кхи доккха хIума а дацара, цундела цунах дийца дагахь дацара шаьш аьлла Саидов Iадлана.
Цу дийнахь догучу цIа чуьра кIелхьараваьккхина исс стаг а, ши цициг а.
