Москвахь динчу тIелатаран ларашкахула талламаш беш бу
Ницкъаллийн структурийн белхахошна тIекховдарца доьзна зуламан гIуллакх талларх бинчу хаамехь иштта яздина Талламан комитето. Лаьцначун цIе шайн дIахьедарехь йоккхуш яц цара, амма хьалхо агенталлаша йовзийтина цуьнан цIе.
Дийцарехь, иза вехачу хIусамах а хьоьвсина, ткъха иштта, цуьнан доттагIашлахь а, бевза-безачу нахалахь а бина талламаш.
"ТIаьххьарчу заманчохь схьаийна вацара иза" аьлла лаьцначун накъосташа. Талламан комитето хаам барехь, кхин дIа а зуьйш бу шеконашца лаьцначун го, уьш а зуламаш дан кечлуш хиларна кхоьруш.
ХIун хилла Ленинскан проспектехь
Карарчу беттан 15-чохь Москварчу Ленинскан проспектехь делкъал тIаьхьа герзаш диттина, лазийнера ГИБДД-н ши белхахо.
Юьхьанца дийца даьккхира, цхьана таксхочо диттира герз бохуш, делахь а, тIаьхьо къаьстира билггал хилларг. Некъан полисхоша таксхочунна гIуда тоьхна, протокол хIотточу хенахь, леррина церан машенна герга а вахана, герз кхийса волавелла хилла зуламхо. ХIинца а билггал хууш дац, муьлха герз хилла цо лелийнарг.
"Интерфаксан" агенталло дуьйцу, травматикан 9 мм калибр йолу "Фантом" тапча ю кхийсинарг бохуш. Ткъа РБК-с чIагIдо, бIахаллин кепе ерзийна МР-79-9Т газан тапча хилла цуьнгахь бохуш.
Лазийна ший а полисхо дарбан цIийнехь охьавиллина, цхьаъ вуно чолхечу хьолехь ву.
Полисхочо дуьхьал герз тоьхна, чов йина тIелеттачунна а. "Интерфаксан" хьосташа яздо, иза а дарбан хIусамехь ву, цуьнгара хьал а ледара ду бохуш.
Мила ву Галаев Ратмир
Билггал хуучу шайн хьостах пайда а эцна, "Интерфакс" хаамийн агенталло яздира, тIелеттарг Галаев Ратмир ву аьлла. Церан информацица, жимачу стеган 24 шо ду, схьавалар ГIалгIайчуьра ду цуьнан.
Кхин хIара-важа аьлла, кIорггера хаамаш бац цунах лаьцна. Делахь а, "Интерфаксан" хаа таро хилла кIентан гергарчу нахах.
Мацах ГIалгIайчуьрчу Госнаркоконтролан оперативан декъан хиллачу куьйгалхочун, иштта оццу хьукматан урхалла динчун кIант ву боху Галаев.
Цул совнаха, Галаевн ваша ГIалгIайчуьрчу полицин белхахо а ву.
ГалаевгIеран вежарий бехачу Карабулакерчу а, Эккажакъонгий-Юртарчу а шина цIийнах хьовса бахана а хилла ницкъаллийн структурийн белхахой.
Москвахь Галаев Ратмиран хIусамехь экстремистийн литература карийна бохуш, чIагIдо. ТIелеттачун экстремистийн хьажам хилар коьрта верси ю боху "Интерфаксо", цо динчу тIелатаран.
Иштта тIечIагIдо цара, Москвахь ГIалгIайчуьрчу экстремизмана дуьхьало латточу Центран куьйгалхо Эльджаркиев ИбрехIим верна а Галаев бехке хила тарло бохуш.
Эльджаркиевн гIуллакх толлучу юкъанна лаьцна ву ГIалгIайчуьра иттех сов стаг - доккхачу декъанна Эккажакъонгий-Юьртара бахархой.