Росфинмониторинго Навальныйн штабаш экстремистийн могIара яьхна
Федералан финансашкахула мониторинг ечу урхалло (Росфинмониторинг) Навальныйн штабаш экстремистийн тептара яьхна. Оцу хьокъехь, юкъараллин цхьаьнакхетаралла "Навальныйн штабаш" язйина тептара, аьлла ю урхаллин сайта тIехь зорбане яьккхина информаци. И тайпа цхьаьнакхетаралла юридикан маьIнехь янне а яц, дIахьедира хьалхо Навальный регионашкарчу проектийн куьйгалхочо Волков Леонида.
Прокуратуро Охан-беттан 16-чохь экстремистийн могIара яха бохура Навальныйн фондаш а, штабаш а – оппозиционер мацалла лаьцна а Iаш, цуьнан агIончаш пачхьалкхехь гуламаш хIитто кечлучу юкъанна дара иза. Урхалло чIагIдарехь, Навальныйн тоба дагахь ю "беснийн революцин" сценарица коституцин хIоттам хуьйцу хьелаш кхолла". ХIинцале а Коррупцина дуьхьалоен фонд арахьарчу агентийн могIара язйина а йолуш, кхело хьалхара ладегIарш долийна Навальныйн цхьаьнакхетараллаш экстремистийн тептара яхар луьстуш. Кхечу бехктакхаман гIуллакхца доьзна лоцу аьлла, пIераскана лаьцна Фондан адвокат.
Охан-беттан 26-чохь Москван прокуратуро дIахьедира ша кхелан сацам хиллалц йолчу ханна дIасацабо Навальныйн штабийн болх, "цуьнан лидерша а, фондийн декъашхоша а низамаш талхор сацош дацарна, нах юкъа а ийзош, низамехь йоцу акцеш латтош хиларна", аьлла. Юьйцурш ю Охан-беттан 21-чохь хилла акцеш. Прокуратуро ша гIуданаш деттар ду аьлла штабийн болх дIабахбечарна.
Политикан регионашкара штабаш дIакъевлина, хаам бина Навальныйн накъоста Волков Алексейс Охан-беттан 29-чохь. Таханлерчу кепехь штабаш латтайойла дац, церан болх экстремизманна буха бигина, набахтин хенаш етта тарло болх бечу штабийн белхахошна, цаьрца зIе латточарна, царна гIодечарна, аьлла цо.
Навальныйн агIончийн штабаш йиллира иттаннаш регионашкахь 2017-чу шарахь, оппозиционер харжамашкахь дакъалаца волавелча. Дуккхаъчу регионашкахь уьш болх бан йисира 2018-чу шарахь харжамаш бирзича а.