Мангал-беттан 14-гIа де Буденновскехь Басаев Шемалан тобано закъалтхой лийцина де ду

Мангал-беттан 14-хь Ставропол-махкарчу Буденновск гIалина динчу тIелатаран волайнхой дагабохкуьйту. 1995-чу шарахь цу дийнахь ичкерихойн буьйранчин Басаев Шемалан тоба тIелетира низамхойн белхалошна, цара цигахь закъалтхой лецира, уьш меттигерчу лазартнехь дIагулбира. ТIелеттачара сихонца Нохчийчуьра тIом сацабе, цигара оьрсийн эскарш арадаха аьлла, дIахьедира.


Цул тIаьхьа кхо де даьлча, мангал-беттан 17-хь, шайга лазартне схьа ца йаккхайелча, тобанхошца дийца буьйлабелира. Премьер-министр Черномырдин Виктор цхьадолчунна резахилира. Мангал-беттан 19-хь Басаевн тоба, кхерамза некъ белла, Нохчийчу дIайахийтира. Цаьрца 100 закъалтхо вара. Царлахь бара тIаьхо тобано дIахецна бакъоларйархой а.


Официалерчу хаамашца аьлча, тIемалойн тIелатарехь а, оьрсийн спецназо лазартне йоккхуш а кхелхира 129 адам, 415 чевнаш йеш лазийра. Цхьа эзар ахэзар закъалтхо барт биначул тIаьхьа маьршаваьккхира.


Кавказ.Реалии сайто йина Буденновск гIалина тIелатарах нарративан подкаст - журналисто Голенкова Катяс пхеа шарахь бинчу талламийн жамIа ду иза. Доьазза Буденновске йахана, тешашца, барт беш йукъалеллачаьрца, хиллачу закъалтхошца, берашца, бакъоларйархошца, эксперташца къамелаш дина цо. ЛадогIа цу подкасте йерриге аудио-майданашкахь а, ютубехь а.