კლუბ "ბასიანთან" 3 ადამიანის დაჭრისთვის დაკავებულ ბიძინა ჩაჩხიანს ბრალი წარედგინა
დაკავებულის აღკვეთი ღონისძიების შეფარდებაზე თბილისის საქალაქო სასამართლო 14 იანვარს, 11:00 საათზე იმსჯელებს.
ბრალდებულმა ბიძინა ჩაჩხიანმა , 12 იანვარს, კლუბ "ბასიანის" შესასვლელთან ცეცხლსასროლი იარაღიდან გასროლით დაჭრა სამი ადამიანი: 1993 წელს დაბადებულ თ.ა., 1987 წელს დაბადებული ბ.ჭ. და 1995 წელს დაბადებული დ.ც., თავად კი ადგილიდან მიიმალა.
კლუბ ბასიანთან მომხდარი თავდასხმის ფაქტზე ბიძინა ჩაჩხიანი 12 იანვარს დააკავეს. დაკავებულის პირადი ჩხრეკისას ამოღებულია ცეცხლსასროლი იარაღი, 6 ცალი დანა და 23 ცალი ვაზნა.
გამოძიება შსს-მ დაიწყო საქართველოს სისხლის სამართლის კოდექსის 19-109-ე მუხლის მე-3 ნაწილის "ა" ქვეპუნქტითა და 236-ე მუხლის მე-3 და მე-4 ნაწილებით, რაც ორი ან მეტი პირის განზრახ მკვლელობის მცდელობასა და ცეცხლსასროლი იარაღის მართლსაწინააღმდეგო შეძენა- შენახვა-ტარებას გულისხმობს. დანაშაული 20 წელს, ან უვადო პატიმრობას ითვალისწინებდა. პროკურატურის მიერ ბრალის ჯანმრთელობის განზრახ მძიმე დაზიანებისა და ხულიგნობის მუხლებით გადაკვალიფიცირების შემდეგ, მას 9-დან 13 წლამდე პატიმრობა ემუქრება.
ბიძინა ჩაჩხიანი წარსულში ნასამართლევია. პატიმრობიდან ამნისტიით იგი 2012 წელს გათავისუფლდა.