ბათუმში „ოცნების ქალაქის“ მცხოვრებლებმა მორიგი აქცია გამართეს - ისინი გარანტიებს ითხოვენ
ბათუმში „ოცნების ქალაქის" დასახლების მცხოვრებლები აქციას მართავენ და გზის გადაკეტვას ცდილობენ.
ადგილობრივი გამოცემა „ბათუმელების“ ცნობით, აქციის მონაწილეებმა „ოცნების ქალაქის“ მიმდებარე გზის გადაკეტვა რამდენჯერმე სცადეს, თუმცა პოლიცია მათ ამის საშუალებას არ აძლევს.
დემონსტრანტები ამბობენ, რომ ითხოვენ, „ოცნების ქალაქის“ ყველა მოსახლეს მისცეს გარანტია, რომ საცხოვრებელ ბინებს აუცილებლად მიიღებენ - და ეს საგარანტიო ხელშეკრულებით დაუდასტურონ.
საცხოვრებელი ფართებით დაკმაყოფილებას ე.წ. „ოცნების ქალაქში“ მცხოვრები მოქალაქეები 2012 წლიდან ითხოვენ.
მათ ყოფილი 23-ე ბატალიონის ტერიტორიაზე თავდაპირველად მუყაოსა და ფიცრული სახლები თვითნებურად ააგეს. თანდათან მათი რიცხვი გაიზარდა და დასახლებაში დღეს უკვე 2 000-ზე მეტ ქვის ქოხია.