“Метро мен пойыздар тоқтап қалды“. Грузия тағы да жарықсыз қалды
25 шілдеде таңертең Грузияның едәуір бөлігінде электр қуаты қайта өшті. Бұл - кейінгі екі күнде болған екінші жағдай, - деп хабарлайды Tengrinews.kz тілшісі Sputnik-Грузия басылымына сілтеме жасап.
Әлеуметтік желі қолданушыларының жазуынша, Грузияның бірнеше қаласы, соның ішінде Тбилиси шамамен сағат 08:00-ден бастап электр қуатынсыз қалған. Сондай-ақ, өңірлерде де жарық сөнген.
Елордада жарықтың жаппай сөнуіне байланысты метроның жұмысы тоқтап, елдің батысында пойыздар жүрмей қалды.
Болған оқиғаның себептері туралы әлі ресми пікір берілген жоқ.
"Мамандар ақаудың неден болғанын анықтап жатыр. Ірі нысандар, клиникалар мен стратегиялық кәсіпорындар дереу резерв генераторларға көшті», - делінген хабарламада.
Тбилиси метросы мен "Грузия темір жолының" жұмысы шамамен екі сағаттық үзілістен кейін қайта қалпына келтірілді.