Заев до опозицијата: Можете да пукнете што не го решивте прашањето за името

Премиерот Зоран Заев им порача на пратениците од опозицијата дека можат да пукнат што не го решиле спорот со името со Грција додека биле на власт и не ја внеле Македонија во ЕУ и во НАТО. Тој одговарајаќи на пратенички прашања во Собарнието, изјави  дека сите потези што ги повлекол, биле во интерес на граѓаните и за иднината на земјава

До неговиот коментар дојде откако пратеникот на ВМРО-ДПМНЕ, Крсто Јовановски ги нарече предавници  премиерот Заев и пратениците од парламентарното мнозинство.

„Вие најдовте да зборувате за патриотизам и неморални постапки. Заради коцка и комар од мене земавте пари, а денеска вие зборувате за патриотизам. Вие што ја опљачкавте Македонија за 5 милијарди евра. Сета ваша ништожност покажува каков карактер сте. Вие кои ја уништивте Македонија, вие ќе зборувате за вредности и државност. Со сите аморални аспекти се дрзнавте безобразно да зборувате и да навредувате. Вбризгувате омраза кон народот“, рече Заев.

Претходно Заев ги повика пратениците од опозицијата заедно да се израдуваат на, " убавата вест дека Македонија доби датум за почеток на преговори во јуни 2019 година". 

„Убаво е некогаш заедно да се израдуваме на позитивни одлуки за Македонија. Мислам дека е дегутатно до ден-денеска да се негира фактот дека Македонија доби датум за преговори“, изјави Заев, одговарајќи му на Горан Манојловски од ВМРО-ДПМНЕ кој праша дали Македонија навистина добила датум за почеток на преговори за влез во ЕУ, констатирајќи нереализирани проекти.

Според Заев,  доказ за добиениот датум е тоа што скрининг процесот во Македонија ќе почне на 17 јули. Тој дополни дека доказ оти датумот е добиен, е и тоа што Европскиот совет никогаш повеќе нема да се навраќа на Македонија да утврдува датум за преговори.