Градежниците бараат да запре укинувањето на ДУП-овите
Сојузот на стопански комори (ССК) денеска побара да престане укинувањето на донесените детални урбанистички планови, бидејќи, како што рекоа од Сојузот, тоа ја доведува во прашање правната сигурност на инвеститорите, а големи финансиски штети, освен нив, трпат и останатите поврзани сектори, граѓаните кои одлучиле да купат стан, како и банките и државата.
Според Градежната комора на Македонија, со укинувањето на постојните ДУП-ови, практично се укинува високоградбата. Оттаму велат дека инвеститорите ќе престанат да градат и ќе пропаднат, а воедно се ипраќа и сигнал до компаниите, и домашни и странски, никогаш да не инвестираат во Македонија.
„Правната сигурност не смее да се доведува во прашање, ниту да се доведуваат во неизвесност инвеститорите кои немаат никаква поврзаност со донесувањето ДУП-ови или купувачите на недвижен имот и банките што ги дале кредитите врз основа на предимотен лист или хипотеки“, рече на прес-конференција претседателот на Градежната комора Ивица Јаќимовски.