По катастрофалните пожари, во Грција ќе се уриваат над 3000 дивоградби
По катастрофалните пожари во Атика во Грција минатиот понеделник, во кои имаше над 90 жртви, во Грција се уште се бараат причините зошто толку луѓе трагично загинаа, а многумина сметаат дека освен лошите временски услови, силниот ветер и брзината на пожарот, своја, негативна улога одиграле и дивоградбите.
Според Министерството за животна средина на Грција, во децентрализираната администрација на Атика постои листа со 2.500 дивоградби во шума, но и 685 дивоградби на брегот, кои според препораките на катастарските шумските служби треба да се урнат, изјави портпаролот на грчката Влада, Димитрис Ѕанакопулос.
„Се работи на тоа листата да добие приоритет и ќе направиме се што е неопходно, ќе се конфронтираме со кој било ако е потребно за да ја заштитиме и Атика, но и целата земја од веројатноста за една нова ваква природна катастрофа во иднина“, рече Ѕанакопулос.