Стапката на ДДВ за станови останува пет проценти
Предложените измени на Законот за додадена вредност денеска влегоа во собраниска процедура и добија поддршка на собраниската Комисија за финансирање и буџет, а во нив се предвидува да остане повластената стапка на ДДВ од пет проценти за новоизградените станови.
Министерот за финансии Драган Тевдовски изјави дека по предложените измени на законот се врши пролонгирање на рокот до 31 декември 2023 година за примената на повластената даночна стапка од пет отсто на првиот промет на станбени згради и станови во делот во кој истите се користат за станбени цели и кој ќе се врши во рок од пет години по изградбата.
Поддршка на измените дадоа и членовите на ВМРО-ДПМНЕ кои ги поздравија измените и оценија дека се од корист на граѓаните и стопанството.