Сијарто му порача на Хан да се грижи за проширувањето на ЕУ
Унгарскиот министер за надворешни работи, Петер Сијарто денеска кусо изјави дека еврокомесарот Јоханес Хан треба да се грижи за проширувањето на ЕУ, а не за законските процеси во земјите членки. Сијарто реагираше на изјавата на Хан дека Унгарија најверојатно нема да го екстрадира Груевски.
Сијарто изјавата ја даде по новинарско прашање на редовниот брифинг по Советот на министри за надворешни работи на ЕУ и притоа не ја спомена Македонија, ниту случајот со Груевски.
Хан, утрово запрашан дали ги поддржува амандманите на Европскиот парламент во извештајот за Македонија во кои се бара Унгарија да го врати Груевски во Македонија, одговори „се надевам дека тоа ќе се случи, но не е многу веројатно бидејќи двете земји немаат спогодба, но ја разбирам позицијата на Европскиот парламент“.