Трамп со писмо до Тачи – Постигнете договор со Србија, нема да има друга ваква шанса наскоро

Американскиот претседател Доналд Трамп го повика Косово да стори се што е во негова моќ за да постигне долгорочен договор со Србија, две децении по завршувањето на војната. Во писмото до косовскиот претседател Хашим Тачи, кое беше објавено на интернет страницата на косовскиот претседател, Трамп вели дека „неуспехот да се искористи оваа единствена можност ќе биде трагично назадување“ и оти „друга шанса за сеопфатен мир веројатно нема да се повтори наскоро“.

„САД многу инвестираа во успехот на Косово како независна, суверена држава“, се наведува во писмото.

„Со нетрпение ве очекувам Вас и претседателот Александар Вучиќ во Белата куќа за да го прославиме она што ќе биде историско договор“, пишува Трамп до Тачи.

Косово прогласи независност од Србија во 2008 година и досега го признаа над 100 земји, но не и Србија.

Во 2013 година, Приштина и Белград се обврзаа на дијалог под покровителство на ЕУ, чија цел е да ги реши сите отворени прашања, но постигнат е мал напредок.

Тензиите меѓу двете земји се засилија минатата недела, откако косовскиот парламент донесе одлука за трансформација на Косовските безбедносни сили во армија, една недела откако Белград се закани дека тоа може да предизвика воена интервенција од страна на Србија.