Трудо го разреши канадскиот амбасадор во Кина

Канадскиот премиер, Џастин Трудо го разрешил канадскиот амбасадор во Кина, кој предизвика политичка сензација со своите коментари за случајот на екстрадиција на финансиската директорка на „Хуавеј“, Менг Ванжу.


„Синоќа ја побарав и прифатив оставката на Џон МекКалум од должноста канадски амбасадор во Кина“, рече Трудо без објаснување на причините.


Џон МекКалум ја деградираше либералната влада на Трудо, велејќи дека Менг Ванжу може да има силни аргументи против тоа да биде екстрадирана во САД. Поранешни амбасадори го обвинија МекКалум за неприфатливо политичко мешање во случајот кој предизвика голема штета во односите меѓу Канада и Кина.


Менг, која е ќерка на основачот на „Хуавеј“, беше уапсена во Ванкувер минатиот месец по барање на САД за наводни прекршувања на американските санкции кон Иран. Беше ослободена со кауција минатиот месец, а ќе се појави на суд во Ванкувер на 6. февруари. Кина реагираше со апсење на двајца канадски државјани под обвинение за кршење на националната безбедност, а трет беше осуден на смрт поради наводна трговија со дрога.