Во следните неколку дена Уставните амандмани во Службен весник – Македонија станува Северна Македонија
По исполнување на сите правни услови за влегување во сила на конечната спогодба и уставните амандмани, Владата на Република Македонија ќе го објави во Службен весник датумот на влегување во сила на Уставните амандмани и Уставниот закон.
Потоа, соопшти денеска Министерството за надворешни работи, Република Северна Македонија и Грција ќе достават заедничко писмо до Генералниот секретар на ОН, со кое го информираат Антонио Гутереш за датумот на влегување на сила на конечната спогодба, со што се става крај на повеќедеценискиот билатерален спор меѓу двете земји.
„По ова, Република Северна Македонија на соодветен начин ги информира: Секретаријатот на ОН, земјите-членки, земјите набљудувачи на ОН, како и сите останати меѓународни организации чија членка е, за настанатите промени“, се наведува во соопштението.
МНР во соопштението подвлекува дека сето ова се очекува да се случи во следните неколку дена.