Судири на полицијата со крајната десница во Украина

Украинската полиција соопшти дека 22 полицајци биле повредени во судиите со припадници на крајната десница кои се обиделе да ја нападнат претседателската поворка во пресрет на изборите закажани за овој месец.

Полицијата денеска соопшти дека 19 полицајци вчера биле хоспитализирани во градот Черкаси, каде што поддржувачи на партијата Национален корпус се обиделе да ја блокираат автомобилската поворка на претседателот Петро Порошенко, барајќи апсење на личностите поврзани со наводниот воен корупциски скандал.

Судирите избија по предизборниот говор на Порошенко во пресрет на претседателските избори закажани за 31 март.

Полицијата соопшти дека двајца полицајци биле повредени во судирите со активистите на Националниот корпус во близина на претседателскиот кабинет во Киев, а еден завршил во болница.

Во едно новинарско истражување објавено минатата недела беа објавени наводи за проневери во украинската воена индустрија, во кои е вклучена и фабрика контролирана од Порошенко. Според истражувањето, синот на близок сојузник на Порошенко, Олег Хладковски, организирал шверц на резервни делови за воена опрема од Русија во 2015 година, една година откако Русија нелегално го анектираше Крим и им даде поддршка на сепаратистите во источна Украина. По објавувањето на истражувањето, Порошенко објави дека е отворена истрага. Тој исто така го отпушти Олег Хладковски.