Новото име може да се најде во учебниците следната школска година
Постои можност во следната школска година во учебниците да биде внесено новото уставно име Република Северна Македонија , но само доколку ставовите се усогласат на паритетна основа и доколку роковите за новата учебна година и наставните програми го овозможуваат тоа, изјави владиниот портпарол Миле Бошњаковски. Но, како што вели во моментов не може точно и прецизно да се каже дали тоа ќе се случи во новата учебна година.
Претходно вклучување на новото име „Северна Македонија“ и во грчките учебници, најави заменикот министер за надворешни работи на Грција, Маркос Боларис.
Запрашан дали ќе следува казна за вицепремиерот задолжен за европски прашања Бујар Османи, бидејќи неодамна не сакал на новинарите да им одговори на македонски кога ја промовирал Агенцијата за спроведување на Законот, портпаролот рече дека Владата не работи врз принцип на казни, а недоследностите игрешки кои постојат во однос на Законот за јазиците се трудат да ги надминат и да ги поправат.
Другиот владин портпарол Муамед Хоџа, исто така одговарајќи на новинарско прашање зошто не бил ставен законот за пописот на вчерашната седница, рече дека нема недоразбирања за законот за попис. Тој вели дека Владата на следната седница ќе го разгледа законот за попис и се очекува тој да помине.