Кабинет на Иванов- антикорупционерите донесоа „политичка одлука“
Кабинетот на Претседателот Ѓорге Иванов преку соопштение реагираа на одлуката на Државната комисија за спречување на корупцијата да поднесе прекршочни пријави против шефот на државата нарекувајќи ја “политичка одлука”.
Од таму наведуваат дека целосно ги отфрлаат тврдењата дека со донесувањето на указите претседателот постапил спротивно на законите и ги пречекорил овластувањата.
Антикорупциската комисија вчера поведе две прекршочни постапки за Иванов поради донесени укази за унапредување и поставување старешини во Армијата за време на изборниот период, објавени во Службени весник на 26.02.2019 година, што, како што наведоа од комисијата, претставува непочитување на забраните утврдени на Изборниот законик и Законот за спречување корупција и судир на интереси.
Од Кабинетот на Иванов сега изразуваат разочарување што Државната комисија за спречување на корупцијата не ги земала предвид образложенијата и законските основи врз кои претседателот ги донел указите.
“Претседателот на Република Македонија ги донесе указите во согласност со Уставот на Република Македонија и законите. Како врховен командант, Претседателот на Република Македонија нема обврска да бара одобренија за надлежности кои му се пропишани со закон”, наведуваат од Кабинетот на Иванов.