Град Скопје повика на спортско однесување и прославување без говор на омраза
Град Скопје, градоначалникот Петре Шилегов и координаторите на сите советнички групи во Советот го поздравуваат огромното постигнување и европската ракометна шампионска титула на „Вардар“.
Тие сите заедно повикаа на достоинствен пречек и славење на успехот на ракометарите, а изразија и несогласување со изолираните случаи кои, како што се наведува, сакаат да стават дамка на прославата.
„Остро го осудуваме и се дистанцираме од секој обид за неспортско навивање и однесување, ширење говор на омраза и национализам, како и пароли кои повикуваат на насилство и дискриминација кон кои било групи и поединци. Апелираме до надлежните државни органи
да постапуваат согласно со законските норми со цел да се избегнат евентуални несакани случувања кои може да го нарушат позитивниот тек на денешниот настан. Уште еднаш упатуваме искрени честитки за историската победа на „Вардар“ и пожелуваме вакви нови спортски
успеси и во иднина“, се вели во заедничката изјава.