Верушевски: Господ знае што се имаат главните виновници Груевски, Грујовски и Бошковски
„Оваа документација што ја поседува СЈО е минорна во однос на тоа што го поседуваат овие три лица. Само еден Господ знае што се друго поседуваат. Поседуваат и друга документација која не е предмет на ова обвинение“, рече Верушевски.
Тој индиректно го обвини СЈО што Груевски, Грујовски и Бошковски не се присутни во државата, како и на ова судење, потенцирајќи дека, според него, „тие тројца се главни „виновници“.
„Базичната документација, нејзиниот обем, нејзината целосна структура се наоѓа во рацете на луѓето кои се во Грција и во Унгарија“, рече Верушевски и нагласи дека „мандатот на СЈО од тоа време до денес е со цел да се урне митот дека таа документација е сечена и лепена“.
Според обвинителниот акт, преку три системи за следење на комуникациите во УБК во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Биле прислушувани над 20 илјади граѓани.
Претходно, поранешниот директор на УБК, Сашо Мијалков се откажа од испрашување на Верушевски.
На рочиштето на 23 септември, Верушевски ја негираше неговата вклученост во преземањето на бомбите од разузнавачите од УБК, Ѓорѓи Лазаревски и Ѕвонко Костовски, и тврдеше дека не нему, туку бомбите тие ги давале во СДСМ, а тој само ги обработувал. Премиерот Зоран Заев, кој како советник за безбедност во кабинетот го има Верушевски, набрзо по ова, изјави дека Верушевски на следното рочиште за „Таргет-Тврдина“ ќе го појасни исказот.
Премиерот Зоран Заев ќе сведочи во случајот на следното испрашување закажано за 24 октомври.