Северна Македонија стана дел од триото претседавачи на ОБСЕ
Како што истакна Османи, еден од најважните приоритети во 2022 година ќе биде токму претседавањето со ОБСЕ преку активната улога како дел од тројката, но и преку подготовка за претседавањето во 2023 година
Со денешниот ден, како прв работен ден во годината, нагласи Османи, се презема претседавањето со Групата на медитерански партнери- Алжир, Египет, Израел, Јордан, Мароко и Тунис и притоа како копретседавачи во првата година од нашето учество во тројката ќе се организира и Медитеранската конференција меѓу ОБСЕ и земјите медитерански партнери најверојатно во Скопје, а потоа се презема и управувањето со донесувањето на буџетот на Организацијата.
Македонија од 1 јануари влегува во тројката на претседавачи со ОБСЕ
Тој изрази уверување дека МНР, со поддршка и на останатите релеватни институции, има капацитет да одговори на предизвикот и да биде на висина на задачата и истакна дека во таа насока во буџетот за оваа година се предвидени околу 110 милиони денари односно околу 1,8 милиони евра. За годинава, дополни Османи, предвидено е да се упатат околу 15 дипломати во мисијата во Виена, кои ќе работат во рамки на претседавачкото трио и водењето на групата на медитерански партнери, но и ќе се подготват за финално преземање на претседателството со ОБСЕ во 2023 година.
„Претседавањето со ОБСЕ за нас ќе претставува и внатрешен трансформативен процес од консумент стануваме креатор и контрибутор на политиките на светско ниво. Ваквата инверзија на улогите претставува нова можност за нашето внатрешно институционално и политичко созревање, но во исто време рака под рака со глобалната експонираност тоа претставува и можност за зајакнување на имиџот на државата преку афирмација на нашите вредности и визии“ , рече министерот кој истакна дека ОБСЕ е најголемата регионална безбедносна организација ОБСЕ во која членуваат 57 земји, заедно со 11 медитерански и азиски земји партнери на организацијата.