Британскиот здравствен систем под притисок, но нема нови мерки против ковид-19

Британскиот премиер Борис Џонсон денеска предупреди дека здравствениот систем во земјата е под притисок поради големиот раст на бројот на заразени со коронавирус, но наведе дека нема да бидат воведени нови ограничувања за спречување на заразата.


Бројот на новозаразени вчера беше над 137 илјади поради појавата на позаразниот омикрон сој, а 73 луѓе починаа.



Една година вакцинација, половина свет вакциниран


„Мислам дека мора да бидеме свесни дека притисокот врз нашиот здравствен систем, нашите болници, ќе потрае со недели, а можеби и подолго“, рече Џонсон за време на посетата на вакцинален пункт во Ајлесбури.


Неговата изјава следува по објавата на Сандеј тајмс дека болниците на истокот на земјата предупредуваат на „екстремен и без преседан“ недостиг на персонал.

Владата сепак не планира да воведува нови мерки, а премиерот ги повика граѓаните да се вакцинираат.


„Мислам дека добар пат за земјата е оној по кој сега се движиме. Ќе ги држиме работите под контрола. Мислам дека комбинацијата на работи кои сега ги правиме е вистинската“, рече Џонсон.


Британската влада во јули ги укина скоро сите ограничувања воведени поради пандемијата на коронавирус, но минатиот месец беше активиран планот Б кој предвидува задолжително носење маски во затворени простории, доказ за вакцинирање или негативен тест за влез во ноќни клубови и апел до сите што можат да работат од дома.