Ескобар - САД ќе ги санкционираат корумпираните и оние кои го дестабилизираат Балканот

Американскиот специјален пратеник за Западен Балкан, Габриел Ескобар вели дека САД нема да се двоумат да користат санкции за да испратат силна порака до корумпираните актери и оние кои го дестабилизираат Западен Балкан.


Тој во интервју за црногорската агенција МИНА, вели дека лидерите на Западен Балкан мора да работат во интерес на граѓаните, наместо за нивните лични и партиски интереси.


Ескобар додава дека САД ќе бидат партнер на оние кои имаат конструктивен, а не деструктивен пристап кон иднината на овој регион.


„Многу е фрустрирачки и контрапродуктивно што политичарите и другите актери ги искористуваат идентитетските теми за да добијат политички поени на сметка на економскиот напредок и регионалното помирување“, рече Ескобар.



САД со нови санкции кон Додик


Денеска Министерството за финансии на САД воведе нови санкции кон членот на босанските Срби на тричленото претседателство на Босна и Херцеговина, Милорад Додик. Санкциите за дела за корупција се воведени против самиот Додик, но и против Алтернативната телевизија од Бања Лука, која е поврзана со Додик.