Пендаровски-Пич: Надминување на блокадата во пристапот кон ЕУ ќе донесе стабилност

Претседателот Стево Пендаровски денеска оствари средба со Стјуарт Пич, Специјален претставник на Обединетото Кралство за Западен Балкан. Соговорниците, како што се наведува во соопштенеито на кабинетот на Пендаровски, размениле мислења и информации за актуелните состојби во земјава и регионот, како и можностите за соработка со Обединетото Кралство за темите од заеднички интерес, поврзани со стабилноста и безбедноста, како и зајакнувањето на институтциите во борбата против организираниот криминал и високата корупција.


На средбата, според соопштението, се разговарало и за прашањата поврзани со членството на Република Северна Македонија во Европската Унија и тековниот дијалог со Република Бугарија.


„Претседателот Пендаровски го информираше сер Стујарт Пич за напредокот на дијалогот помеѓу двете земји. Во тој контекст, претседателот Пендаровски се заблагодари за интересот и поддршката на Обединетото Кралство за македонско-бугарскиот дијалог и подвлече дека надминувањето на блокадата за почеток на пристапните преговори со Европската Унија ќе внесе дополнителна предвидливост и стабилност на Западниот Балкан“, се наведува во соопштението.


Соговорниците, меѓу другото, како што се додава, разговарале и за одличната билатерална соработка меѓу Северна Македонија и Обединетото Кралство и можностите за зајакнување на соработката меѓу двете држави и за обезбедување натамошна британска поддршка во повеќе области и форми.



Британскиот специјален претставник за Западен Балкан во дводневна посета на Скопје


Пич за време на дводневна посета на земјава ќе има средба и со премиерот Димитар Ковачевски, министерот за надворешни работи Бујар Османи и со министерката за одбрана Славјанка Петровска.


За време на неговиот работен престој во Скопје специјалниот претставник Сер Стјуарт ќе се сретне и со претставници на опозицијата и на дел од младинските организации во земјата. Како Специјален претставник на премиерот, Сер Стјуарт ќе работи со лидерите од Западен Балкан, и другите претставници од регионот и сојузниците од САД и Европа во поддршка и зајакнување на регионалната стабилност. Неговата работа, исто така, ќе вклучи промовирање на силни демократски институции и отворени општества, преку поддршка во справувањето со сериозниот и организиран криминал и другите заеднички безбедносни предизвици. Од Северна Македонија, тој заминува во посета на Бугарија.