Обвинителството во координирана акција со Белгија и Холандија за спречување на троговија со дрога
Од Основното јавно обвинителство за гонење на организиран криминал и корупција денеска соопштија дека постапувајќи по барање за меѓународна правна помош под раководство на предметен обвинител од обвинителството денес од раните утрински часови се спроведувало кооординирана акција на шест локации на територијата на Скопје при што се лишени од слобода две лица. Во исто време, како што се наведува, се спроведени и акции во Белгија и Холандија од тамошните истражни органи. Обвинителството притоа ќе спроведе истрага за против двете лица за кои постои основано сомнение дека сториле кривично дело- Перење пари и други приноси од казниво дело.
„Според добиеното Барање за меѓународна правна помош, под раководство на белгиски истражен судија се спроведува истрага за криминална организација која меѓудругото се занимава и со неовластено одгледување на канабис и продажба на наркотична дрога. Од дејствијата на Истражниот судија и Федералната судска полиција на Западна Фландрија, утврдено е дека поголемиот дел од членовите на организираната криминална група се македонски државјани или потекнуваат од нашата држава, а останатите се од Холандија, Бугарија и белгиски државјани“, се наведува во соопштението.
Групата на неколку плантажи во Белгија, според соопштението, неовластено одгледувала канабис од 1 јануари 2020 година, а можеби и порано. Осомничените македонски државјани, како што се наведува, периодично биле на релација Белгија и Холандија и Република Северна Македонија со оглед дека во матичната земја имаат оформено свои семејства. Воедно, тамошната истрага утврдила дека осомничените дел од парите стекнати со кривично дело ги носат во РС Македонија, а со дел купуваат недвижен имот на белгискиот пазар на недвижности.
Полицијата запленила 1,6 тона дрога во вредност од 3,2 милиони евра
Во акцијата се запленети парични средства, оружје, возила и златен накит, како и докази од трансакции на големи суми на пари на банкарски сметки ,притоа од слобода се лишени две лица кои ќе бидат изведени пред судија на претходна постапка при Кривичниот суд. Ценејќи дека постојат околности што укажуваат на постоење на опасност осомничените да се дадат во бегство, да се сокријат, како и да ги уништат трагите од кривичното дело, да влијаат врз сведоци или да го повторат делото, надлежниот јавен обвинител, како што се посочува, до судијата на претходна постапка ќе достави Предлог за определување на мерка притвор за осомничените. Воедно, обвинителството ќе побара и привремено замрзнување на имотот на осомничените лица.
Во исто време во акцијата во Белгија од слобода се лишени 11 лица и е извршен претрес на 20 локации, а во Холандија при претрес на пет локации биле уапсени пет лица. Меѓу уапсените лица во Белгија и Холандија има и македонски државјани.