Ковачевски: Протоколот од бугарското МНР не е пристигнат кај нас

Нашиот став како Влада е дека преговарачката рамка треба да биде мултилатерален документ што содржи рамка за преговарање во однос на пристапување кон ЕУ како организација на држави членки, додека билатералните прашања треба да се решаваат на билатерално ниво со државите со коишто тие постојат, изјави денеска премиерот Димитар Ковачевски во одговор на новинарско прашање дали земјава го има променето ставот дека нема да прифати билатералните прашања да влезат во преговарачката рамка.

„Со оглед на тоа дека нашиот пат кон евроинтегрциите и пред НАТО интеграцијата беа исполнети со билатерални прашања, прво со прашањето со Грција за што имаме Преспански договор и имаме втор Договор што се однесува на билатерални прашања со Бугарија и којшто е потпишан со цел билатералните прашања да се решат, ние сме на став како Влада дека преговарачката рамка треба да биде мултилатерален документ во којшто се разговара и во којшто се става рамка за преговарање во однос на пристапување кон ЕУ како организација на држави членки, а додека билатералните прашања треба да се решаваат на билатерално ниво со државите со кои тие постојат, рече Ковачевски на заедничата прес-конференција со финската колешка Сана Марин.

Што и да одлучи Бугарија - Македонија ќе заглави на патот кон ЕУ

Тој изрази надеж дека ЕУ ќе усвои преговарачка рамка која што ќе отсликува мултилатерален карактер на документот.

„Од решавањето на отворените прашања коишто постојат, а тоа го покажуваат искуствата на другите држави коишто пристапувале кон ЕУ, а имале отворени билатерални прашања со држави коишто веќе биле членки во Унијата, исто така, зависи и прогресот во делот на преговорите откако тие ќе отпочнат. Така да, јас се надевам дека земјите членки на ЕУ и ние нормално како Влада дека ќе усвојат преговарачка рамка која што ќе отсликува мултилатерален карактер на документот, а додека од другата страна земјите во овој случај Република Бугарија со која што имаме билатерални отворени прашања, дека ќе биде на ниво на соседна држава која што сака да ја види другата соседна држава како полноправна членка на ЕУ“, рече премиерот Димитар Ковачевски.

Во однос на протоколот од бугарското МНР, Ковачевски изјави дека тој се уште не е пристигнат во нашето МНР.

„Сите документи за коишто зборувате и за коишто се зборува во јавноста коишто се однесуваат на одлуки коишто треба да се носат во Бугарија, се наоѓаат во нивното Собрание според тоа што се гледа од медиумите. А во однос на комуникација на документи и пристигнување, бидејќи имаше таква вест којашто беше излезена дека има документ којшто дошол во МНР на РСМ, не е точно дека дошол документ“, вели премиерот Ковачевски.

Радев: Бугарската Влада да се изјасни за „францускиот предлог“, а не Собранието

Тој појасни дека протоколот не претставува посебен договор, туку е всушност статусот и понатамошни чекори кои треба да се преземат во однос на спроведувањето на Договорот за добрососедство, што го имаме со Бугарија и обврските коишто во тој Договор ги презеле и Северна Македонија и Бугарија.

„Протоколот е работа на Министерствата за надворешни работи и на експертските групи во однос на тоа до каде се стигнати со одредени прашања. Протоколот се потпишува на ниво на МНР и кажува што е постигнато досега и што е тоа што претстои во наредната фаза,“ вели премиерот Ковачевски.