Русија ги отфрли обвинувањата на Пендаровски за вмешаност во протестите во Скопје
„Ги отфрламе обвинувањата упатени против нашата земја - Русија не се мешала, не се меша и нема намера да се меша во внатрешните работи на која било држава, вклучително и Северна Македонија, и покрај тоа што се обидуваат да ја фатат со ова. Ова е во спротивност со самата филозофија на руската надворешна политика. Добро е познато дека ваквите обиди никогаш не го носат посакуваниот ефект и на крајот ги дискредитираат оние кои прибегнуваат кон такви методи. Ние го почитуваме кој било избор на македонскиот народ, подготвени сме и понатаму да ја градиме нашата соработка заснована токму на ваквата основа - на меѓусебно почитување и еднаквост“, се наведува во соопштението од Руската амбасада.
Протестите ја продлабочија поделеноста во и онака поделеното општество
Во соопштението се наведува дека со внимание ги следеле изјавите на претседателот Пендаровски во интервјуата за македонската телевизија ТВ 21 и за грчкиот весник Етнос во однос на делувањето на Русија во Македонија и на Балканот во целина.
Пендаровски за Етнос на 10 јули рече дека Москва произведува најсериозни хибридни закани за Балканот, а за ТВ 21 два дена претходно дека има информации дека Русија ги злоупотребува протестите во Скопје против „францускиот предлог“, но и дека се уфрлени луѓе од соседните земји да испровоцираат инциденти.