Лондонскиот подземен транзитен систем денеска е запрен поради штрајкот на вработените незадоволни од платите. „Ги советуваме клиентите воопшто да не патуваат со метро“, рече портпаролот на метрото во Лондон. До ова дојде еден ден по националниот штрајк на железничарите што резултираше со откажување на околу 80 насто од патничките возови. Слична акција на железницата е закажана за утре. Сето ова е дел од летната кампања според која работниците од приватниот и јавниот сектор бараат зголемување на платите поради зголемените цени на храната и енергијата.
Зголемени трошоци, исти плати - синдикатите се закануваат со тужби
Поштенските работници, адвокатите, телекомуникациските работници и пристанишните работници најавија штрајк за кон крајот на месец. Во Единбург, санитарните работници на 18 август започнаа 11-дневен штрајк токму во моментот кога туристите почнаа да пристигнуваат во градот за фестивалот „Edinburgh Fringe“. Инфлацијата во Обединетото Кралство во јули достигна 10,1 насто.
