Ердоган кон Грција - еден ден ќе го изгубиме трпението

Турскиот претседател Реџеп Таип Ердоган и се закани на Грција со воен одговор „доколку продолжат провокациите“. Овој одговор се однесува на неодамнешниот случај кога турските воени авиони биле цел на противвоздушно оружје додека летаа над спорните острови во Егејското Море.

„Ако имаат острови и воени бази и одредени претензии кои се нелегални и се закани за нас, еден ден ќе го изгубиме трпението. Кога ќе го изгубиме, сè може да се случи“, одговори Ердоган на прес-конференција во Сараево на прашањето за најновиот спор со Грција.

Системите за противвоздушна одбрана С-300, кои ги користи Грција, во моментот на прелетувањето биле насочени кон турски авиони за време на рутински лет над островите во Егејското Море.

Ердоган: Европа го жнее тоа што го посеа

„Вознемирувањето на нашите авиони со радари не е бениген чекор“, додаде тој.

Сојузниците во НАТО Грција и Турција во повеќе наврати се најдоа на работ на војна поради територијални спорови.

Новите тензии започнаа на 23 август, кога, според турското Министерство за одбрана, Грција распоредила системи за противвоздушна одбрана С-300 од руско производство за да таргетираат турски авиони Ф-16 за време на вежбата на НАТО, што Атина го негира.

Турција би можела да посредува за нуклеарната централа Запорожје

Ердоган во саботата изјави дека Грција и се заканува на Турција со системите за противвоздушна одбрана С-300 и дека ќе плати „висока цена“ доколку „продолжи така“, драматично ескалирајќи ја ситуацијата.

Турскиот министер за одбрана Хулуси Акар изјави дека Анкара очекува објективност од НАТО во однос на грчката употреба на С-300 во потера по турски авиони. Според него, Грција го игнорира меѓународното право, добрососедските односи и пријателството.