СДСМ предлага измени со кои партиите ќе се дистанцираат од фашизам

Координаторот на пратеничката група на СДСМ, Јован Митрески и пратеничката Соња Мираковска до Собранието предложија измени и дополнувања на Законот за политичките партии, по скратена постапка. Целта на предлогот е да се зголеми транспарентноста и дистанцирање од фашизмот, нацизмот и национал-социјализмот.


Со предлог законот ќе се овозможи поголема транспарентност, како на постоечките така и на идните политички партии, гарантирање на правната сигурност на граѓаните својствени за една демократска, современа и цивилизирана правна држава, се наведува во предложениот текст.


Се очекува законот да биде ставен на дневен ред на денешната 88. седница. На седницата веќе е ставен предлогот на ВМРО-ДПМНЕ за измени на Законот за здруженија, со спорни имиња кои се доверуваат во релација со фашизам и нацизам, предложен од пратеничката Рашела Мизрахи.



Бугарски здруженија и клубови - или промена на име или бришење


Во образложението на Законот предложен од СДСМ, објавен на веб страната на Собранието, стои дека со Предлог законот се заштитуваат демократските вредности како и принципите на правната сигурност на граѓаните во едно демократско општество.


И двата предлог закони потсетуваат еден на друг, на што посочи и Мизрахи. Таа смета дека СДСМ го ископирале истиот текст од предлогот на ВМРО-ДПМНЕ за изменување и дополнување на Законот за здруженија и фондации.