Екс премиерот на Пакистан Кан започна „долг марш“ за предвремени избори

Поранешниот пакистански премиер Имран Кан денеска започна таканаречен „долг марш“ до главниот град на Пакистан, Исламабад, притискајќи ја владата да распише предвремени избори. Кан, поранешна меѓународна ѕвезда во крикет, беше сменет во април со гласање недоверба по пребегнувањето на некои од неговите коалициски партнери, но тој и натаму има голема поддршка во јавноста. Кан собра стотици приврзаници во источниот град Лахоре за да се приклучат на караванот автомобили и камиони што се упати кон главниот град Исламабад.


На екс пакистанскиот премиер Кан му е забрането да извршува јавна функција пет години


Откако беше сменет, Кан одржа митинзи низ Пакистан, предизвикувајќи опозиција против коалициската влада на неговиот наследник Шехбаз Шариф. Илјадници луѓе се очекува да му се придружат на неговиот моторизиран конвој кој ќе патува околу 380 километри од Лахоре до Исламабад во текот на следната недела, застанувајќи на патот за да одржи митинзи и да собере повеќе демонстранти. Безбедноста е веќе засилена во главниот град, со стотици бродски контејнери поставени на клучните раскрсници, подготвени да ги блокираат учесниците на маршот. Судири меѓу приврзаниците на Кан и полицијата избувнаа за време на сличен протест во мај.