Софија: измените на законите за здруженија и партии го попречуваат исполнувањето на Договорот за добрососедство

Бугарското Министерство за надворешни работи изразува загриженост поради изгласаните измени на законите за здруженија и фондации и за политички партии во македонското Собрание. Според Министерството, измените имаат за цел „дискриминација и ограничување на правото на здружување на Бугарите во Северна Македонија“, бидејќи има „еднострано толкување на историските факти“. „Легитимната желба за спротивставување на сите форми на екстремизам и омраза не може да се инструментализира за намерно ограничување на правата на одредени задници. Ограничувања од ваков вид веќе им беа наметнувани на Бугарите во Северна Македонија во минатото. Со слични аргументи, во 2001 година беше забранета организацијата „Радко“, што е псевдонимот на Иван Михајлов. Европскиот суд за човекови права (ЕСЧП) веќе донесе одлука по ова прашање“, се наведува во реакцијата на бугарското МНР.

МНР реагира на изјавата на Костадинов дека „Македонија е Бугарија“

Според Министерството, „механизмот согласно кој Консулативното тело во Скопје издава позитивно мислење, за да може да се дозволи употреба на дадено име, презиме, прекар, псевдоним, кратенка или иницијали на историска личност, го поставува прашањето за наметнување пристап во интерпретацијата на историските личности и настани да биде доминантно официјалното интерпретирање што го има Северна Македонија“. Посебен проблем, како што наведува бугарското Министерство, претставува одлуката на Парламентот на Северна Македонија воопшто да не го вклучи комунизмот, како тоталитарна и репресивна идеологија, во примената на усвоените промени. „Се уште нема ниту законодавна мерка, ниту механизам за рехабилитација и компензација на убиените и настраданите за време на комунистичкиот режим во поранешната СР Македонија, прогонувани и репресирани единствено поради бугарската самосвест, се наведува во соопштението на бугарското МНР.

Советодавното тело на Владата го оцени негативно барањето за регистрирање на клуб со името на Цар Фердинанд

Според Министерството, ваков тип законодавни мерки го попречуваат целосното исполнување на Договорот за добрососедство. Во Собранието во вторникот едногласно беа донесени измените на Законот за здруженија и фондации, поднесен од ВМРО-ДПМНЕ и на Законот за политички партии, поднесен од СДСМ, со кои се забранува здруженија и партии да носат фашистички имиња. Предложените законски измени на двете партии уследија по отворањето бугарски клубови во земјава со имињата „Ванчо Михајлов“ на 16 април во Битола и „Цар Борис Трети“ на 7 октомври во Охрид. Со измените на двата закона се предвидува отфрлање на фашизмот, нацизмот и националсоцијализмот во сите општествени форми на здружување. Со усвоените измени, сите досега формирани здруженија и фондации, како и политички партии, имаат рок од три месеци да се усогласат со новите законски измени.