ЕС бара натамошни чекори во усогласувањето на Западен Балкан со визната политика

Европскиот совет го поздрави напредокот што го постигнаа земјите од Западен Балкан во усогласувањето на визната политика на Европската унија и ги повика брзо да преземат понатамошни чекори, наведувајќи дека ова е итно и од клучна важност за управување со миграцијата и добро функционирање и одржливост на безвизните режими.


Во заклучоците што на самитот ги усвоија шефовите на држави и влади на ЕУ, се наведува дека треба да се зајакне мониторингот на визните политики на соседните земји и дека ЕУ е подготвена да ја продлабочи соработката со земјите од Западен Балкан во областа на миграцијата, азилот, управувањето со границите и враќањето, максимално искористувајќи ги постоечките рамки и достапни канали.




„Треба да бидат покриени сите миграциски рути, исто така со соодветни ресурси. Треба да се спроведат постојните акциски планови за рутите низ Западен Балкан и централниот Медитеран. Комисијата треба што поскоро да ги претстави акционите планови за Атлантскиот, Западниот и Источниот Медитеран со цел брзо ублажување на притисокот врз најпогодените земји-членки и ефикасно спречување на нередовните пристигнувања“, се наведува во заклучоците.


Претседателката на Европската комисија, Урсула фон дер Лајен изјави дека е многу важно Европскиот совет јасно да препознае дека миграцијата е „европски предизвик кој бара европски одговор“ и посочи дека доколку сите 27 членки на ЕУ работат заедно, таму не е предизвик што тие не можат да го решат. Борбата против трговијата со луѓе и криумчарењето мигранти дополнително ќе се зајакне, соопшти Европскиот совет и ја осуди употребата на мигрантите за политички цели, особено „кога тие се користат како дел од хибридни дестабилизирачки акции“.