Поранешниот шеф на разузнавачката служба на БиХ е ставен на „црната листа“ на САД
На „црната листа“ е ставен и Драган Станковиќ, вршител на должноста директор, а потоа и директор на Управата за геодетски и имотно правни работи на Република Српска (РУГИП), еден од двата ентитета во БиХ. Третото лице кое е санкционирано од САД е Един Гачанин, за кој се вели дека е „еден од најголемите светски шверцери на дрога“.
„Тројцата поединци назначени денес претставуваат закана за регионалната стабилност, институционалната доверба и аспирациите на оние кои бараат демократско владеење на Западен Балкан“, изјави Брајан Е. Нелсон, потсекретар за тероризам и финансиско разузнавање во американското Министерство за финансии.
„САД ќе продолжат да ги таргетираат оние кои ја продолжуваат корупцијата и ги поткопуваат повоените договори и институции воспоставени како дел од тешко стекнатиот Дејтонски мировен договор“, додаде Нелсон.
Во образложението се наведува дека во својство на генерален директор на Агенцијата за разузнавање и безбедност на Босна и Херцеговина, Осман „Осмица“ Мехмедагиќ ја злоупотребил државната телекомуникациска компанија во корист на Партијата за демократска акција (СДА), една од најголемите политички партии во Босна и Херцеговина.
„Мехмедагиќ го користел БХ Телеком за собирање мобилни податоци за политичари од БиХ кои не се поврзани со партијата СДА. Мехмедагиќ, исто така, наложил едно лице да следи владин функционер поврзан со опозициската партија на ентитетот Република Српска (РС)“, се наведува во образложението.
Според него, Мехмедагиќ ја искористил својата позиција, заканите и врските за да ги поддржи кандидатите група бошњачки и граѓански партии од БиХ. Има и веродостојни информации дека Мехмедагиќ соработувал со криминални мрежи за да се збогати себеси и својата политичка партија.
Санкциите против Мехмедагиќ се спроведени согласно извршната наредба на американскиот претседател Џо Бајден за соучесништво или директно или индиректно учество во корупција во Западен Балкан.
Босанската полиција во 2021 година го уапси шефот на Агенцијата за разузнавање, Осман Мехмедагиќ во рамки на истрагата што вклучува перење пари и фалсификување документи. Тој беше приведен на барање на државните обвинители под сомнение за злоупотреба на положба, фалсификување документи за лична идентификација и перење пари, изјави портпаролот на полицијата во Сараево, Мирза Хаџиабдиќ.