Раст на каматните стапки во САД и Швајцарија

Централната банка на САД ги покачи каматните стапки по потресите потреси на финансиските пазари предизвикани од колапсот на две американски банки. Федералните резерви (ФEД) синоќа ги покачија каматните стапки за четвртина отсто, сигнализирајќи дека има спремност за запирање на понатамошно покачување на чинењето на кредитите. Основната каматна стапка за еднодневни депозити е фиксирана од 4.75 до 5.00 отсто, а ова е деветто зголемување досега во напорите на ФЕД за зауздување на инфлацијата во изминатите две години.



Во однос на ненадејните банкротства неодамна на двете крупни банки, Силикон Валеј Банк и Сигначр Банк, ФЕД во својата изјава не напоменуваат за можноста за понатамошно покачување на стапките.




Раст на каматните стапки за 0,5 процентни поени денеска објави и Швајцарската централна банка, која пак предупреди на можни дополнителни покачувања, и покрај превирањата во банкарскиот сектор додека се бори со инфлацијата.


„Швајцарската народна банка дополнително ја заострува својата монетарна политика и ја зголемува основната стапка за 0,5 процентни поени на 1,5 отсто. Со тоа, таа се спротивставува на обновениот пораст на инфлацискиот притисок“, се вели во соопштението на оваа банка.




Ризик за раст на каматните стапки има и од страна на Банката на Англија, што би било 11-то последователно зголемување. Ова може да се случи поради недостигот на свеж зеленчук во земјата што помогна да се поттикне инфлацијата до 10,4% во февруари, изненадувајќи ги аналитичарите кои очекуваа цените да паднат на едноцифрена за прв пат во седум месеци.


На глобално ниво има загриженоста за превирањата во глобалниот финансиски систем по колапсот на двете американски банки и последователните проблеми во швајцарската Кредит Свис Банк, што принуди набрзина договорено преземање од страна на конкурентот УБС.